مقشرات لش

السلام عليكم ~ 

اليوم التدوينه مختلفه عن براند جدا احبها واثق فيها وفي جوده منتجاتها 

تدوينه عن مقشرات لش الجميله حابه اكلمكم عنها بالتفصيل 

بس قبل ما اشرح راح اعطيكم نبذه بسيطه عن لش 

لش عباره عن شركه بريطانيه يصنعون أشياء للسجم بشكل عام والشور والكريمات والماسكات وغيرها من المنتجات  الخاصه بالبشره وكمان عطور وشويه ميك اب . 

والجميل فيها ان منتجاتهم طبيعيه وخاليه من المواد الكيمائيه والمواد الحافظه اللي تضر الجسم على المده البعيد و وضد التجربه على الحيوان وهدفهم الاساسي الحفاظ على البيئه .

بما انو راح اتكلم عن المقشرات فهذا المقشرين اتوقع اشهر شي في لش مقشر اوشن سولت ومقشر رب رب رب ..

يلا نبدا 

Ocean Salt face and Body Scrub 

مقشر اوشن سولت .. يعتبر الافضل مبيعا في لش 

مكونات المقشر :

ملح البحر اللي يساعد على التخلص من الاوساخ العالقة بالمسام و الجلد الميت و الرؤس السوداء لخلق بشرة أكثر نضارة وحيوية وعنصري الليمون و الفودكا اللي يساعدان صفاء ونظاره البشره كمان من مكوناته كريمه جوز الهند .

ملح البحر يناسب البشرة المختلطة و البشرة الدهنية 

المقشر يناسب الوجه والجسم ولا يحسس لانو مكوناته طبيعيه 

المقشر تقشيرو قوي مره يعني لمن تحطيه على جسمك لا تتفركي بقوه عشان لا تجرحي جلدك بس كتقشير بطل  

تحسي بشرتك بعدها جدا صافيه ويعطي نعومه تحسي جسمك انو مو ناشف بعد التقشير زي اغلب المقشرات

ريحتو ريحه حمضيات الليمون مره واضح يعني اللي تحب هذي الروايح راح يعجبها 

يناسب كمان الوجه بس انا ما جربتو على وجهي بس على جسمي  

طبعا الحلو في المقشر انو ذاتي الحفظ يعني خالي من المواد الحافظه والمواد الكيميائيه وموادها طبيعيه 100%

اتوقع اللي بشرتها تتحسس من الليمون او الملح لا تستخدمو تخليه بس للجسم  انا عن نفسي مخليتو للجسم بس 

Rub Rub Rub Scrub

مقشر رب رب رب من لش .. احب هذا المقشر واحب ريحتو وتقشيرو مره لطيف على الجسم 

من مكوناته عصير وزيت الليمون وملح البحر وخلاصه زهر البرتقال والياسمين 
بس تقشيرو انعم من اوشن سولت ولا يخدش وحتى اذا فركتي بقوه لانو زي ما قلت ناعمه الحبيبات 

وفي نفس الوقت يعطي ترطيب ونعومه بعد الشور وحتى وقت الشور تحسي جسمك ناعم ومترطب مرره 

عكس المقشرات اللي تكون تقشيرها خفيف وتجفف الجسم هذا لا العكس تماما عشان كذا عجبني 

جدا مرات ما احط لوشن بعدو احس جسمي مره مترطب بس ارطب اماكن معينه

بس حابه اقولكم اذا تبغي تقسير قوي خذي اوشن سولت هذا تقشيرو خفيف الى متوسط

ريحتو مره عاجبتني منعشه جدا بما انو من مكوناته الليمون نفس اوشن سولت

وبما انو مكوناته ليمون وملح فمع الوقت يعطي نضاره وتوحيد للون الجسم  ويشيل الخطوط البيضاء 

و يزيل الجلد الميت ويجدد البشرة ومع الحركه الدائريه تحرك الدورة الدموية ويزيل السليوليت مع الاستمرار 

هذا هما المقشرين وراي فيهم بس اذا بختار واحد منهم استمر عليه راح اختار رب رب رب 

مو معناتو اوشن سولت سيء بس انا حبيت رب رب رب اكثر وارتحت عليه 

اوشن سولت عادي مع انو هو الاكثر مبيعا بس كل واحد واختيارو الخاص 

*

وبس اتمنى حبيتم التدوينه واستفدتم منها ♥

اكتبولي في الكومنت اي مقشر عجبكم اكثر تعليقاتكم تسعدني 

واشوفكم في تدوينه جديده بإذن الله ♥ ~ 

مع السلامه ♥

طلباتي من لينو شوب

السلام عليكم ♥

تدوينه اليوم عن متجر جدا احبو واثق فيه واهم شي انو كوري ♥♥♥♥♥

متجر متجر لينو | LeneShop

هو متجر الكترونيه تطلبو من موقعهم وعندهم خدمه الدفع عند الاستلام ♥
http://www.lenoshop.com/ar/

نبذه بسيطه عن المتجر :

عبارة عن متجر للمنتجات الكورية وعندهم المنتجات الكوريه اللي مو متوفره عندنا وباسعار مناسبه من ادوات تجميل وملابس وشنط وشوز ومنتجات عنايه بالشعر والبشره ♥♥♥
اول تعاون ليه معاهم كان قيف اواي  واعتبرهم من جد اصدقاء لي واحبهم وطلبت منهم كثير حبوا اني اجرب منتجات لهم وكمان اعطوني كود خصم لمتابعاتي الجميلات تحطوه وقت ما تخلصو من طلبكم ومستمر مده شهر ♥♥♥

المنتجات في التدوينه جديده عليه ما جربتها وبعضها قرات عنها وتحمست اني اجربها

طبعا بعد ما اجربها راح اكتب عنها سوا هنا او في الانستقرام ♥

يلا نبدا ♥

*

عصا كونتوربلاي ثائييه- درجة 2 - إيتود هاوس

وصف المنتج :

كنتور كريمي ثنائي يساعدك في رسم ملامح وجهك بالمكياج لتبدو أكثر حدة وجاذبية.

 الجانب الأول بلون كنتور بني والجانب الثاني بلون اضاءه فاتح .

مره متحمسه اجربو يشبه كونتور ان واي اكس وشفت بوني تستخدمو حمستني اكثر ♥

مزيل المكياج الزيتي ريل آرت المرطب - إيتود هاوس

وصف المنتج :

مزيل مكياج نوعه زيتي يحتوي على مكونات مرطبة للبشرة كزيت جوز الهند وزيت بذور العنب وزيت لب المشمش، كما تساعد على إزالة الجلد الميت.

حبيت مكوناته انو فيه جوز هند وحلو جوز الهند للوجه ♥♥♥♥

سيروم سيلك سكارف للشعر - إيتود هاوس

وصف المنتج :

سيروم للشعر يحتوي على مجموعة من مستخلصات الزيوت ورائحة الزهور، يساعد على التخلص من الشعر المتطاير و يعطي الشعر لمعاناً ويتركه رطباً.

محتاجه سيروم هذي الايام وقرات كثير عن سيروم ايتود هاوس فقلت اجربو خصوص اني احب  هذي البراند ♥

كريم ميسينغ يو - الباندا - إيتود هاوس

وصف المنتج :

كريم يدين يحتوي على خليط من الأعشاب الطبيعية وزبدة الشيا والزيتون لترطب اليدين وتهدئ بشرتها.

اخر منتج من ايتود هاوس كريم مرطب ما اخفيكم اني اخذتو لانو باندا ههههههههههههه ♥♥♥♥

SKIN FOOD - رغوة ميلكي ميلك

وصف المنتج :

رغوة منظفة للبشرة بملمس مخملي كالحليب المخفوق. تساعدك على إزالة الشوائب والأوساخ لتعطيك بشرة أكثر سلاسة ونعومة.

الحليب غني بالبروتينات التي تساعد على الحفاظ على البشرة رطبة وصحية ومشدودة.

اعشق اي شي فيه حليب فوائده كثير للبشره من توحيد لون وتغذيه وكمان سكين فوود جربت كثير من منتجاتهم وخصوصا المقشرات ♥

FOOD - رغوة الأرز لتنظيف وإشراقة البشرة

وصف المنتج :

رغوة منظفة تحتوي على نخالة مياه الأرز يطهر وينظف البشرة، كما يزيل الأوساخ والمكياج وغيرها من الشوائب من البشرة.

قد جربت منتجات كثير بالارز من ماركات مختلفه ومن ذا فيس شوب فاحب اي شي فيه ارز ♥♥♥
وكمان لانو جربت ماسك الارز من سكين فود فتحمست للرغوه وقد كتب عن ماسك الارز في المدونه ارجعو لها

لوشن إت راديانت - بانيلا كو

وصف المنتج :

لوشن مرطب للبشرة يحتوي على مستخلصي الزهور البيضاء كالبابونج والروز والياسمين والنرجس واللوتس. كما يحتوي على حبيبات بيضاء صغيرة ترطب البشرة وتعطيها إضاءة ونضارة.

اول مره اجرب هذي البراند وعليها مدح  عند الكوريين عجبني وصف المنتج ومكوناته بجربه واشوف كيف النتيجه ♥

مزيل مكياج كلين إت زيرو - بانيلا كو

وصف المنتج :

 مزيل مكياج زيتي يزيل المكياج بعناية لاحتوائه على مستخلصات الكرز الهندي والبابايا والأعشاب .

يحتوي على مزيج من الاعشاب التي تهدئ البشرة وتحميها من تأثيرات البيئة .

خالي من الألوان الاصطناعية والعطور الاصطناعية والكحول والبارابين والزيوت المعدنية.

قوامه بلسم جامد ويتحول إلى قوام زيتي عند ملامسته للبشرة.

يالله تعرفو انو هذا المنتج عليه مدح لين الليل من الكوريين واكثر مبيعا واشوف كل الكوريات ما يستخدمون الا هو 

فقلت ليش ما اجربو خصوصا انو لينو صارو يوفرون هذي الماركه اخيرا ♥♥♥♥♥

كريم مياه آيسلندا - للبشرة المختلطة - ذا سيم

وصف المنتج :

كريم مرطب للبشرة المختلطة يساعد على التحكم بافرازات الدهون. يحتوي على مياه بيو المعدنية من ايسلندا والتي توازن مستويات الرطوبة والدهون في البشرة. تذوب كابسولات الماء والزيت في البشرة لتبقيها مرطبة لساعات طويلة. يحتوي على مستخلصات الاعشاب البشرية والمواد المغذية الغنية، لتترك البشرة مشرقة ونظرة.

 اول مره استخدم شي من هذا البراند فقلت اخذ الكريم المرطب لانو مائي ♥

Tony Moly - كريم حلم الباندا السحري

وصف المنتج :

كريم كثيف لليد يقوم بترطيب اليد وتبييضها، هذا الكريم المغذي يعيد لليد

حيويتها ونعومتها ويقوم بتوحيد اللون في نفس الوقت، غيرير لزج وله رائحة فاكهية

واقعه في حب الشكل يا جماعه قاعده امسكو كل وقت حب كبير للباندا ♥♥♥♥♥♥

بس صراحه ترددت اطلبو ما اعرف ليش بس قلت لازم نجربو واذا ما عجبني يصير تحفه باندا هههههههههه

بخاخ جل الصبار المهدئ والمرطب - Nature Republic

وصف المنتج :

بخاخ مرطب يحمي البشرة ويهدئها ، يحتوي على مستخلص الصبار -الألو فيرا 92%- ومستخلصات فيتامين سي وإي ويستخدم للوجه والجسم

هذا الحب جربتو وكتبت لكم عنو في الانستقرام نفس فكره الجل بس بخاخ وفرحت كثير انو رجع اتوفر حطيتو في اول السله ♥

مره يعطي انتعاش حلو يستخدم في كل وقت صبح ليل بعد ما تغسلي وجهك وبعد الماسك وكمان يثبت الميك اب وتقدري تحطيه على اطراف شعرك يشيل النفشه 

مره ما استغني عنو وانصحكم فيه وبقوه ♥♥♥♥♥♥

It's Skin - لوشن فريش للجسم - الورد

وصف المنتج :

لوشن للجسم يحتوي على مستخلصات مكونات طبيعية ليعطي البشرة ترطيباً ناعماً وصحياً.

يحتوي على مستخلصات الورد الغربي ليعطي حيوية وإشراقة للبشرة، ملمسه كريمي ناعم ليرطب البشرة ويعتني بجسمك.

رائحته رائحة الورود الناعمة.

احب اللوشن لمن يكون بالورد احس بريحه منعشه ونظافه بشوف كيف يكون ترطيبه وابلغكم ♥

It's Skin - كريم مرطب للقدمين

وصف المنتج :

تخلصي من الجلد الميت واحصلي على قدمين ناعمة وصحية. يحتوي على مستخلصات 6 من الزيوت الطبيعية كـ زيت الزيتون ونخالة الأرز والصبار و الزيوت المعدنية و وشجرة الكينا نوعه كالبلسم.

حبيت مكونات الكريم خصوصا انو ابغى كريم للقدمين بما انو فتره برد والقدم الله يكرمكم تنشف ويجيها جفاف 

فحلو ترطبي رجلك وتلبسي شراب تدفي وفي الوقت ترطبي رجلك ♥

** اخيرا ماسكات مختلفه من ماركات مختلفه حبيت اخذ كم ماسك بما اني احبها 

وخصوصا انو اسعارها ممتازه وبجميع الانواع **

صحيح لينو شوب قدمو ليه كوبون خصم للمتاابعيني مستمر لمده شهر الكوبون خصم 10%

الكود : Gafory

تحطيه بعد ما تعبي السله تحت تلاقي كود خصم حطيه واضغطي انهاء الطلب يطلع لك سعر مشتراتك مخصوم منه 10% 

*

بس هذي هيا اغراضي ومبسوطه فيهم احس عجبتني اختياراتي وان شاء الله تكون كلها كويسه 

راح اجربهم هذي الفتره مزبوط عشان احكم عليها ♥♥♥

ايش اكثر منتج متحمسين عليه اكتبولي في الكومنت تعليقاتكم تسعدني ♥

واشوفكم في تدوينه قادمه بإذن الله ~

مع السلامه ♥

منتجات خلصتها

السلام عليكم ♥ ..

يا الله زمان عن التدوين معليش جدا كان عندي مشكله في البرامج والمدونه

بس ان شاء الله نرجع باشياء حلوه وتفيدكم ويارب تعجبكم ♥♥♥ .

تدوينه اليوم منتجات خلصتها الشهور اللي فاتت بعضها تكلمت عنها وبعضها راح اقولكم راي فيها

وراح  اكتب اذا حرجع اشتريها او لا ♥♥♥

يلا نبدأ ..

*

اولا منتجات العنايه ♥ ..

منظف للوجه كريمي من مجموعه فيتامين اي من ذا بودي شوب ♥

طبعا تكلمت عنو كثير حتى تلاقو تدوينه كامله عن مجموعه فيتامين اي روحو لها 

المنتج المفضل عندي واكثر من مره اشتريه منهم ♥

طبعا الشكل اللي في الصوره التعليب القديم ذحين غيرو شكلو صار غير وزاد حجمو 

الطريقه تحطي منو على قطنه وتمسحي فيه وجهك يشيل كل الاوساخ العالقه في الوجه 

طبعا ما يحتاج مويه ابدا وهوا كريمي يعني يعطي ترطيب مره جميل 

انا استخدمو كمان لازاله الميك اب بنفس الطريقه والله ممتاز 

يشيل الميك اب بكل سهوله حتى ميك اب العيون 

سعرو 59 .. وطبعا راح ارجع اشتريه  ♥♥♥

قناع مقشر من هيمالايا باللوز والخيار ♥

اممم رايي في ذا المنتج مختلف مره اقول كويس ومره عادي 

الحلوه فيه انو جد ينظف الوجه هو من النوع اللي ينشال معاكي يعني توزعيه على وجهك وتستني ربع ساعه

 لين ما ينشف وبعدها تشيليه ينشال معاكي بدون مويه لانو يتقشر 

وفعلا الاقي مع القشور انو اعطاني مفعول بطل بس لمن تشيليه متعب ما ينشال مره وحده

 وبعضو يقعد لاصق لازم تشيليه بالمويه ويطلع بالقوه هذا اللي ما حبيتو فيه 

بس كتنظيف كويس بس لمن تشيليه متعب ×××

ممكن انا ما استخدمتو مزبوط فماراح اظلمه بس ماراح ارجع اشتريه

 لانو عندي ماسكات افضل ×

سعرو حدود 26 وتحصلوه في كل مكان الصيدليات والسوبر ماركت 

مناديل منظفه من ذا فيس شوب ♥

هذا النوع مخصص لكل البشرات وعندهم كمان انواع ثانيه للبشره الجافه والدهنيه 

احب هذي المناديل بصراحه تشيل ميك العيون وبسرعه وحتى الماسكرا  ♥♥♥

وما شفت منها اي حساسيه او اثار جانبيه 

بس شوفو انتبهو في منها نوعين :

 نوع بس تنظف الوجه وهذا النوع اللي في الصوره لميك اب العيون والشفاه 

عشان مو تلخبطون لانو اسعارهم مختلفه ×

حقت العيون 30 والوجه 10 وراح ارجع اشتريها على طول ♥♥♥

لصاقات للتنقيه والتنظيف من نيفيا ♥

طبعا هذي اللصقات تنظف الانف والذقن وتشيل الروؤس السوداء عن نفسي احبها مره 

ما عندي كثير روؤس سوداء بس لمن احطها واشيلها جد الاقي انفي او ذقني نظيف 

وانشال كل شي في اللصقه رائعه جدا ♥♥♥

طريقتها سهله تتبلي منطقه الانف او الذقن بمويه شويه

 وبعدها تحطي اللصقه عشان تثبت ويكون مفعولها أقوى وتسحب الاوساخ 

عن نفسي مرات ابخ مويه ورد والاصقها اختصر الوقت ومنها ابرد على وجهي ههههههه

تخليها 15 دقيقه بعدها تشيليها بسرعه سحبه قويه عشان ينشال معاكي كل شي 

بعدها لازم لازم تمرري ثلج على الانف او الذقن عشان تتسكر المسام وما تجمع فيها الاوساخ 

هذي الطريقه مره مهمه عشان يصير انفك نظيف ولا تتجمع الجراثيم والاوساخ على الانف مره ثانيه 

سعرها 26 من الصيدليات والسوبر ماركت 

واشترو كميه لانو دائما مخلصه وافكورس حرجع اشتريها ♥♥♥

مقشر للجسم من سوب اند قلوري ♥

 المقشر ريحتو كوفي على شي سويت وفانيلا ريحتهم مع بعض جميله جدا وتروق 

تقشيرو حلو وتذوب في المويه على طول والحبيبات اللي فيه ابدا ما تجرح ومو خشنه ابدا 

مره تعجبني مقشرات سوب اند قلوري

 حتى في مقشر ثاني اسمو فلاك اوي هذا مره رائع ♥♥♥

سوب اند قلوري تحصلوها متوفر فقط في صيدليات بوتس وسعرو 70 

وهل ارجع اشتريها او لا اذا حسيت ابغى شي دلع راح اخذها وغير كذا احب اخذها وقت العروض 

لانو مرات يكون عليها عروض ما تتفوت تاخذي 2 وواحد مجانا ومره عملو عرض 1 وواحد مجانا 

مقشر ومنظف القدم من ذا بودي شوب ♥

قد تكلمت عنو بالتفصيل في الانستقرام بس لا مانع نعيد الشرح ثاني هههه 

هذا المقشر تقشيرو بطل حبيباتو كبيره شويه بس ابدا مو خشنه

 بحيث انو تعطيكي تقشير ممتاز للقدم .. 

طريقتي بعد ما احط رجلي في المويه اخرجها واقشر بحركه دائره كل اجزاء الرجل

 وبعدها استنى شويه واشطفها حتحسي رجلك ناعمه وريحتها فريش

وفي نفس الوقت يشيل الجلد الميت وانتعاشها خيالي لانها بالنعناع  ♥♥♥

سعرو 49 تحصلوه في كل فروع ذا بودي شوب 

وهل ارجع اشتريه او لا في الفتره هذي لا عندي مقشر غيرو ♥ ..

بخاخ الشعر من ذا فيس شوب ♥♥♥

هذا ثاني منتح لذا فيس شوب في التدوينه هههههههههه 

بخاخ الشعر بزهره الكرز الياباني هو بخاخ معطر للشعر يوعدك بانو يمتص الدهون  

يعني اللي شعرها يدهن بسرعه بس تبخ منو كم بخه على الشعر وتختفي الدهون 

ريحتووو جدا جميله والمنتج مناسب لذوات الشعر الدهني اللي يتعبون من شعرهم

صراحه اعترف من كثر ما احب ريحتو خليتو معطر لشعري ريحتو مره عجبتني  

وغير كذا يعطي الشعر منظر طبيعي وشكل مرتب ♥

سعرو 40 اممم ممكن ارجع اخذو اذا احتجتو مره وعشان ريحتو حلوه ♥♥♥

*

الجزء الثاني منتجات الميك اب ♥

ماسكرا رولر لاش من بنفت ♥

فكره الماسكرا انو تقوس لك الرموش وتخلي العيون واسعه 

بدون ما تستخدمي عكافه الرموش راسها يجي منحني بحيث انو تقدري تمشي الرموش على فوق 

نفس وظيفه العكافه و شكل الفرشه فيلو شعيرات صغار 

وهذي اللي تسهل عليكي الوصول لين زوايه العين ♥

جدا جدا رائعه احبها احسها تطول الرموش بشكل طبيعي وحلو ♥♥♥

يعني تقدري تحطي اكثر من طبقه .. بس ما تكثف قد ما تطول الرمشه ولون السواد واضح

 لكن متعبه نوعا ما في التنظيف يحتاج لها مزيل للعين ×

عن نفسي اول ما خلصتها اخذت وحده ثانيه جد جد رائعه سعرها 160 من بنفت ♥

تحصلو بنفت في سيفورا ووجوده ودبنهامز ..

كونسيلر من بنفت ♥

قد قلت لكم اني احب هذا المنتج لونه جاي على اورنج ينفع مصصح للهالات مره فضيع 

طبعا اوزعه على الهالات وبعدها كونسيلر وبس تطلع عيونك بيرفكت ولا يخطط وثباتو عالي 

الدرجه زي مو موضحه في الصوره رقم 3 deep مايله على اورنج عشان كذا ينفع مصحح 

طبعا راح ارجع اشتريه سعرو حوالي 150 ♥♥♥

بلشر دالاز من بنفت ♥

اوعدكم هذا اخر شي من بنفت ههههههههههههه ♥

 انني واقعه في حب اللون احسو ينفع يكون برونز كمان اذا كثرتي منو على عظمه الخد

هذا السواتش للون صوره من النت 

 طبعا كنت ابغى اصور لكم اللون بس العلبه فاضيه خلصتو على الاخير ههههههه

شايفين قد ايش جميل حتى ينفع يكون لون صباحي بس حاليا واقعه في حب هولا ♥

هل ارجع اخذو او لا حاليا لا عندي اكتفاء من البرونز والبلشر ×

صح سعرو حوالي 159 شي زي كذا وبرضو تحصلوه في سيفورا ووجوده ودبنهامز 

فونديشن فيت مي من ميبلين ♥

صراحه مره احب هذا الفونديشن كاستخدام يومي لانو خفيف وتغطيتو خفيفه    

احب استخدمو في الصباح ولمن اروح الجامعه لانو في الصباح تبغي شي خفيف

 ويعطي بشرتك منظر طبيعي تغطيتو 5 ساعات بالكثير ♥

مناسب للبشرات الجافه والمختلطه بس في نوع طلعوه مناسب للبشره الدهنيه 

مايبلين تحصلوها في الصيدليات العاديه زي النهدي ووايتس وبوتس وكمان في سنتربوينت 

سعرو 60 ريال وعن نفسي حرجع اشتريه دائما لانو مناسبني ♥♥♥

قلم للواجب من توني مولي  ♥

طبعا توني مولي ماركه كوريه وجدا عندها منتجات حلوه وسعرها مره مناسب 

بس اقلكم اني واقعه في حب هذا القلم جدا بطل القلم راسو حلو في الرسم ويخليكي ترسمي شعره شعره 

 واحلى شي انو كريمي مو من النوع الثقيل اللي تقعدي تحفري فيه 

انصحكم فيه رائع وسعره رخيص مره 14 ريال بس ♥♥♥

صراحه صدمني ولا على سعرو وطبعا حرجع اخذ منو بالكميات هههههههههه ♥

توني مولي صار لها محلات عندنا في الرياض وجده او تقدرو تطلبوها من النت او التاجرات 

قلم محدد من ذا فيس شوب ♥

 ختامها مسك صح ههههههههه اتوقع طفشتكم بهذا المحدد ♥♥♥

 المحدد مره رائع قوامه جل يعني مو ناشف او متعب في التحديد  الحلو فيه انو جهه قلم وجهه فرشه 

جهه الفرشه تدمجي فيها اللون  وتوزعي على كامل الفم  

هذا اللون مره حلو درجتو ٤ وكان عندي اللون العودي اتوقع رقمو ٢ حلو برضو ♥

 حلو ينحط في الشنطه وسريع تقدري تحطيه وجدا ثابت وهذا احلى شي فيه  

اعشق هذا القلم وسعره رخيص ٢٠ ريال  ♥♥♥♥♥♥♥♥♥

اللي ما جربوه فهو خسران خذو كميه منو راح يعجبكم على ضمانتي صدقوني ههههههههه

*

وبس ان شاء الله عجبتكم المنتجات صح بعضها مكرر وقد تكلمت عنو

 بس حبيت اعيدها هنا في المدونه عشان ترجعو لها في اي وقت ♥♥♥

اتمنى التدوينه نالت على اعجابكم واكتبولي في الكومنت اكثر منتج عجبكم 

تعليقاتكم تسعدني مره ♥ ..

نراكم في تدوينه جديده بإذن الله ~ 

  

مع السلامه ♥