أدوات الميك اب الاساسيه

*

السلام عليكم ~

اليوم راح نتكلم عن شي مهم اللي هو الميك اب بما انو جانا العيد

فلازم نعرف الاشياء الاساسيه اللي نحتاجها في المكياج

الموضوع انطلب مني فقلت افيدكم .. طبعا هو مخصص للمبتدئين بس راح يفيدكم كلهم

طبعا المكياج صار شي اساسي لكل بنت ومستحيل مافي احد ما يحط شي في وجهه

راح نتكلم على الادوات الاساسيه اللي راح تحتاجينهاا واللي تحطيها دائما في شنطه الميك اب حقتك

يلا نبدا ..

كريم مرطب للوجه ..

لازم لازم يكون عندك كريم مرطب اي كريم مرطب مو شرط نفس اللي عندي

فايده الكريم انو يغطي المسام ويحمي بشرتك من انو يتعرض لها الفونديشن على طول

وفي نفس الوقت يخلي شكل الوجه صحي وحلو

كريم الاساس ( الفونديشن )

اختاري الكريم الاساس اللي يناسب بشرتك ولونها لانو الفونديشن يعتبر الاهم في الميك اب كلوو

لانو فايدتو يغطي البقع والحبوب ويخلي البشره صافيه طبعا تحطيه بعد الكريم المرطب

اللي اخترتو في الصوره ميبلين لانو خفيف جدا على الوجه وينفع استعمال يومي وهذا النوع مناسب للبشره المختلطه و الجافه

طلعو منو لون ثاني الكلام عليه ازرق مخصص للبشره الدهنيه ..

خافي العيوب ( الكونسيلر )

هذا الشي المهم وظيفه الكونسيلر انو يغطي الهالات السوداء ويخفيها

طبعا شي مهم انو لازم الكونسيلر يكون افتح من لون بشرتك بدرجه او درجتين بالكثير عشان يعطي بشرتك نضاره

تحطيه بعد الفونديشن عشان تزيلي الهالات السوداء بالكامل

طبعا اخترت الكونسيلر نفس المجموعه حقت الفونديشن لانو هذا يعتبر افضل كونسيلر جميل جدا وينفع استعمال يومي

البودره المضغوطه

وظيفه البودره بعد ما تخلصي من الفونديشن والكونسيلر على وجهك وزعي بالفرشه على كامل وجهك

لانو البودره تثبت الميك اب عشان يقعد معاكي وكمان يعطي الوجه منظر حلو ومرتب .

البودره اللي احب استخدمها دائما بودره ريميل .

قلم تحديد الحواجب , الماسكرا الخاصه بالحواجب

الحواجب وما ادراك ما الحواجب الشي الاساسي في الوجه والشي الاساسي اللي لازم يترتب

لانو اذا ترتبت حواجبك خلاص ميكاجك يكون التوب .. لانو الحواجب كل ما ترتبت تعطي منظر جميل للوجه

قلم الجواجب تختاري اللون اللي قريب من لون الحاجب حقك عشان يكون طبيعي وانتي ترسمي

طبعا القلم يساعدك انك ترتبي حاجبك وترسميه على نفس الاتجاه وتعبي الفراغات

الماسكرا حقت الحواجب تخلي شكل شعرات الحواجب مرتب ومرات تخليكي تستغني عن القلم اذا كنتي مستعجله

الحلوه فيها تخحلي لون الحواجب يثبت ما كنت مقتنعه بالماسكرا الا لمن جربتها

قلم الحواجب من توني مولي قد كلمت عنو في السناب شي ما استغني عنو ابدا ابدا ابدا جميله لابعدد حدد

وتخليكي ترسمي الحواجب شعره شعره

ماسكرا الحواجب المعروفه من بنفت لونها مره حلو بني طبيعي وفرشتها صغيره على قد شعر الحواجب

قد كتبت عنها في الاستقرامم بوست ارجعو له

طبعا في بنات يحبون بودره الحواجب البودره للبنات اللي شعر حواجبها عريض وكثير بس تستخدم البودره

عشان ترتب فيها حواجبها عشان تطلع طبيعيه يعني ما تحتاج قلم للرسم

واللي حواجبها قليله تقدر تستخدمها بعد القلم عشان تخلي لوكها طبيعي

قلم تحديد العيون ( الكحل )

يعتبر الكحل شي اساسي في الميك اب الاسود معروف الكل يحبه يعطي منظر للعيون جميل

يعني مستحيل ما تحطي في شنطه مكياجك كحل

الكحل الاسود يعطي جمال للعيون ينحطي فوق او تحت العين فوق لتكبير العين

الكحل البيج جدا مهم للي عيونها صغيره تحطيه داخل العين عشان يكبر عيونك بشكل طبيعي

اللون البيج جدا مهم .. اكحال ريميل بالنسبه ليه تعتبر اجمل وارخص اكحال وجودتها حلوه

واكيد الكحل البيج حقكم مشهور ومافي احدد ما يعرفو

ظلال العيون

طبعا الظلال كثيره ومتنوعه في منها اللون الغامق والفاتح والترابي وغيرو وكل وحده وحسب الشي اللي تحبه

انتي اختاري الباليت اللي تشوفيه راح يخدمك وراح تستخدمي اغلب الالوان حقتو

او اشتري الالوان المفرده اللي تحبيها بس الخيارات كثيره وانتي تختاري اللي تحبيه

بس لازم يكون عندك فرش اساسيه لظلال وكل فرشه لها استخدام معين عشان يطلع معاكي الشغل مرتب

العلبه اللي عندي من شوكلت بار من توفيسد تحصلونها في سيفورا ..

الماسكرا

مستحيل ما يكتمل مكياج العيون من دون ماسكرا هيا جدا اساسيه لانها تبرز جمال العيون

 تكثف الرموش وتطول الرمش .. في انواع كثيره للماسكرا في تكثيف وفي تطويل وفي الاثنين

اللي في الصوره من بنفت ذا ريل تساعد على تكثيف الرموش بس ما تطولها

عندهم النوع الثاني اللي اسمها رول راشلز هذي تطول الرموش بشكل جميل يعني ما تحتاج رموش

تقدري تسوي الثنتين مع بعض تصير عيونك كانك مركبه رموش مرره رائعه مع بعض

احمر الخدود ( البلشر )

طبعا اللمسه الاخيره هيا البلشر شي اساسي البلشر يعطي لوك جميل للفيس 

تقدري تختاري اللون اللي تحبيه من البلشر ومن اي ماركه تحبي 

اللي في الصوره من اتش اند ام وبصراحه انا واقعه في حب الميك اب حقهم الجديد صار مره جميل 

وعندهم الوان كثيره وتحير وتركبتها مره تجنن وواضح اللون 

الارواج والاقلام المحدده 

طبعا هذولا اشياء اساسيه .. اختاري الالوان اللي تناسبك وتناسب لون بشرتك 

وحاليا المحددات صارت اجمل واثبت من الروج بكثير 

اللي في الصوره الروج من ريميل .. المحدد من اتش اند ام انصحكم فيه مره رائع 

_________________________________________

*

وبس خلصنا التدووينه .. من اول في بالي وقلت لازم اكتبها 

ان شاء الله تفيدكم وتحبوها 

اكبتولي تحت ايش الشي اللي تحبيه في الميك اب عامه ؟؟

تعليقاتكم راح تسعدني كثيرا 

وكل عام وانتم بخير ..

في أمان الله ~