العنايه بالبشرة ..

*

السلام عليكم ~ 

زمان ما كتبت تدوينه جديده تاخرت .. بس هذي التدوينه ان شاء الله راح تفيدكم كثير 

حبيت اكتبها حاليا في هذا الوقت بالتحديد لانو الدراسه والدومات بدأت فلازم تهتمو بالبشره  

لانو البشره بتكون معرضه اكثر للحراره والجراثيم فلازم العنايه فيها 

حبدا باهم المنتجات والخطوات المهمه في العنايه بالبشره بشكل عام 

 ×× المنتجات مو شرط اساسي نفس منتجاتي اهم شي الخطوات والمنتجات اللي تناسبك انتي وتناسب بشرتك ××

بس اللي حابه اقولكم انو بشرتي مختلطه بعض المناطق دهنيه وبعضها شبه جافه 

فاغلب المنتجات اللي في الصور ناسبتني واللي نفس بشرتي ان شاء الله تناسبها ~ 

يلا نبدا 

غسول الوجه 

شرط اساسي ومعروف هو تنظيف الوجه يعني ما راح تكون البشره نظيفه اذا ما نظفتيها بالغسول 

ولا راح تشوفي نتيجه من عنايتك اذا ما اهتميتي بتنظيف بشرتك 

اختاري نوع منظف لطيف ومناسب لنوع بشرتك، وبعدها نظفي بشرتك في حركات دائرية لمدة دقيقه. 

بعدها اشطفي بشرتك بمويه دافئه او بارده .

الغسولات اللي استخدمها في الصوره :

الاولى فيشي للبشره الدهنيه الى المختلطه جميل في التنظيف يعني تحسي ينظف كويس بس قوي مره يعني ينفع جدا للبشره الدهنيه اكثر شي ..

الثاني افين برضو للبشره الدهنيه والمختلطه هذا الغسول حبيتو جدا حسيتو ناسبني تماما ومسمره عليه تنظيفو عميق .

طبعا الاثنين كلهم طبييين يعني اضمن من الغسولات العاديه ..

التونر 

كثير ما يهتمو بالتونر او ما يعرفون ايش هو التونر اعتبر التونر شرط اساسي بعانيتك لبشرتك 

وخصوصا البشرات الدهنيه واللي بعانو من المسامات 

وطريقه استخدام التونر بعد تنظيف بشرتك جففيها مزبوط بمنشفه الوجه حقتك بعدها استخدمي قطعة من القطن اغمسيها في التونر واستخدميها لمسح بشرة الوجه  وتجنبي العيون لانها منطقه حساسه  التونر يساعد على الحفاظ على موازنه حموضه البشره ويقفل المسام عشان ما تتعرض للاوساخ والبثور الصغيره اللي تطلع تحت الجلد .

* التونرات اللي في الصوره كلها من ذا فيس شوب * 

تونر الارز مناسب لجميع البشرات حبيتو خفيف وتمتصو البشره بسرعه ورحتو لطيفه .

الثاني تونر الشيا مناسب للبشره الدهنيه والمختلطه من مجموعه الشيا هذي المجموعه مخصصه للبشرات الدهنيه والمختلطه لانو الشيا لطيفه وتقلل المسام للبشرات الدهنيه .

الترطيب والكريم المرطب 

شرط اساسي بعد الغسول والتونر الترطيب يحافظ على نعومه وصفاء ونظاره البشره وهذي لازم تكون مهمه في عنايتك اليوميه

بعد أن يجف التونر تمامًا من وجهك ، حطي شويه من المرطب على بشرتك ووزعيه في حركات دائرية على البشرة. اختاري كريم مرطب لطيف ومناسب لبشرتك. التنظيف، ترا جدا جدا جدا مهم .

المرطبات اللي استخدمها من اليمين :

 مرطب فيتامين اي من بودي شوب وقد تكلمت عنو بالتفصيل في تدوينه مجموعه فيتامين اي ..

اللي في النص من لوريال كريم مرطب للبشره المختلطه حلو ترطيبو خفيف وتمتصه البشره قوامه جيلي شويه بس ينشف بسرعه ومو من النوع اللي يدبق في الوجه .

الاخير من ذا فيس شوب مجموعه الارز مناسبه لجميع البشرات هذي المجموعه تساعد على التفتيح مع الوقت لانو معروف فوائد الارز في البشره والتفتيح والنضاره .

اممم ما لاحظه فيه شي بس احلى حاجه فيه ترطيبو حلو كمان تكلمت عنو في تدوينه منتجات كوزريه احبها ارجعو لها .

ترطيب العيون 

ترطيب العين مهم جدا لانو معرضه اكثر للجفاف وتبرز الخطوط اللي تحت العين وخصوصا مع السهر بتطلع الهالات ويجف الجفن فلازم من الترطيب .

طبعا كل اللي في الصوره من بودي شوب حلوين في الترطيب الاول اللي غطاه اسود جل خفيف وغير معطر ويجف بسرعه اوزعه فوق وتحت العيون لترطيبها .

والثاني برضو يرطب ومع الاستخدام المستمر بيساعد على التفتيح بس برضو ما اشوف تفتيح اكثر من ما هو مرطب 

العنايه بالشفاه 

اخر خطوه في عنايتك اليوميه ترطيبي شفايفك لانو توحد لون فمك وتمنع انها تتقشر او تجف مع حراره الجو 

وغير كذا ما تشوفي اسمرار حول او في اطراف الفم 

استخدمي مرطب ما يكون معطر او يكون ملون لون قوي لانو ما ينفع يكون يومي .

الاول من ميبيلين لوني بنك خفيف حلو لانو لب ستيك فسهل الاستخدام بس تفتحيه ومسحه على فمك وخلاص 
انا احب اللي زيو اللون ازرق لانو مالو لون بس طبعا حالتو صعبه فصورت لكم هذا ارتب ههههههههههه .

الثاني زبده الفراوله من بودي شوب ترطيبها أقوى لانو زبده احبها قبل النوم لانو تعطي مفعولها في الترطيب وطبعا ما تنشف بسرعه عشان الزبده اثقل .

بخاخ البشره 

بخاخات الوجه المنعشه للبشره .. امم خليتها في الاخير لانو ماهي شرط اساسي في روتين عنايتك بالبشره 

بس هيا حلوه لانها تعطي انتعاش وارتوى لبشرتك مع الحراره تحتاج البشره شي ينعشها ويبرد عليها  .

اي بخاخ بشره تستخدميه حلو مافي شي محدد او كويس كلها تودي نفس الغرض 

اللي على اليمين من نتشورال ريببلك بالصبار حلو جدا وريحتو لطيفه احسو نفس الجل حقهم بس خلوه على بخاخ 

الثاني من افين مياه منعشه للوجه مره حلوه بس حطيها في الثلاجه وبخي منها يعطي بشرتك انتعاش مو طبيعي احبها 

الاخير من بودي شوب مجموعه فيتامين شي قد تكلمت عن المجموعه في تدوينه مستقله للمنتجات المجموعه 

احب هذا البخاخ واكثر من مره اشتريتو معروف عن فيتامين سي انو مغذي للبشره ويعطيها نضاره ومع الوقت البخاخ بيساعد بشرتك يعطيها صفاء ونضاره حلوه 

* اخيرا التقشير طبعا ما حطيت صور لمقشرات وتفاصيل عنها لانو ما تعتبر من اليوميات زي اغلب المنتجات اللي شرحتها فوق تقشير البشره مفيد لكن بعدل لانو كل ما زاد الشي عن حدو انقلب ضدو ..
يعني تقشير الشفايف والوجه خليه يومين في الاسبوع واي مقشر استخدمي حتى اذا طبيعي يعني اللي تسويه في البيت من مكونات طبيعيه فايده التقشير ينشط الدوره الدمويه وفي نفس الوقت يزيل الاوساخ اللي جوا زي الروؤس السوداء وغيرها  *

* حابه اقول شي من الضروري تعرفي المنتجات اللي تناسب نوع بشرتك عشان تحصلي على النتائج المزبوطه 

 لمن تجربي منتج مره اثنين ثلاثه وما شفتي او ما حصلتي نتائج فعاله في خلال فترة فخلاص هذا المنتج غير مناسب لك 

ولا حل مشاكل بشرتك و لازم تبدليه لانو مستحيل تلاقي منتج يناسب بشرتك من اول شراء حتشتري كثير لين تلاقي اللي خلاص يناسلك و يكون منتجك المفضل .

البشرة هي جزء حساس من الجسم وتحتاج لعناية واهتمام خاص فيها لانها اكثر عرضه للاوساخ و تتراكم الجراثيم والبكتيريا فيها بسهولة وهذي من اسباب وكثره المشكلات لبشرتك وكمان مع استخدام المكياج كل يوم  تزيد المشكلات اكثر واكثر وتتعب البشره عشان كذا لازم تتأكدي من تنظيف بشرتك يوميا بطريقة صحيحه وبالخطوات عشان تحافظي على صحتها وحيويتها . *

*

وبس معليش اذا الشرح مطول بس حبيت اكتب كل التفاصيل في العنايه بشكل عام 

عشان الكل يستفيد وتكون هذي التدوينه مرجع للكل الكبير والصغير 

العنايه ما تقتصر على احد الكل لازم يعتني في بشرته ..

اتمنى حبيتم التدوينه .. واي سوال او استفسار اسالوني 

وفي أمان الله ~